Pianna: Lengtong Pauno kici Cin Za Hau Pau pen Pa Zel Khaw Khai leh Nu Ciang Khaw Niangte ta 11 sung panin a nau tum pen, nau kongkhakpa ahi hi. Kum 1962 August 23 ni-in Sakollam ah suak hi. Kum 1990 June 25 ni-in Vangteh nungak (Kawlpi a om) Lia Goih Khan Dim tawh Tonzang khua-ah pum khat suahna nei-in Rev. Thawng Khaw Nang in lethat hi. Tu lai takin a pu a pate khua ahi Tuithang khua-ah a zi leh tapa 3 tawh a teng uh hi.

Lengtong Pauno cih hong pianna: Bang hanga “Lengtong Pauno” kici hiam cih leh a nu leh pate in “Pauno” ci-in sam uh hi. Lengtong lakhui a bawl uh ciangin Tg. Pauno min tawh la sa uh hi. Pauno kici lasiam dang ong tam ciangin ama min a gen nuamte in Lengtong a lasa Pauno cihna-in “Lengtong Pauno” cih min khat hong piang khia hi. Ama deihna-ah bel a nu leh pa phuah “Pauno” cih mah deih pen a, vantung dongah a min ding ahih manin thupi a sa hi.

La tawh kisai nasepna: Kum 8 a phak a kipanin Pasian phatna la tomnote phuakin Sunday School khawngah a sa thei zel hi. Kum 11 a phak laitakin nungak talpi khat ngai a, ama theih loh kalin la khat phuakin “Na min thei bang lolo nuam ing” ci deep sam hi. Tua bangin la phuah leh lasak kipanin 1981 kumin a masa pen la khum hi. A la phuak khempeuh akigawmin 200 bang val ta ding a, tua lakah dawng 60 bang Studio-ah kisa khin zo hi. Lakhui pen amah guak bekin a khum khui 3 bang phain lawmte tawh a khum Lengtong No.1, 2, 3 pha zo hi. La phuahte sung pan hoih sak diak cih bang nei loin, hoih sa khin lel a, nupite in a tate min pen mi’n hoih sa kei taleh hoih a sak veve danin gen hi. A khui hawm khiat sung panin Lengtong No.5 “Zogam hong paal ding” cih mah tha ngah pen hi. “Tun sung khat pan piang hi ngeingei hang e” cih la pen Lengtong No.1 a khum ding lai-un Zangkungah Cia Paute inn sungah TS Khai leh Sua Mang tawh amau teng thum kikumin a phuah uh hi a, Lynn Studio-ah a khum uh ciangin a paisuak (soprano) Vum Nang in sa hi. Tua lai-in a phuak pen Lengtong cih ding a thukim sa uh hi napi-in a nung ciangin a la minthang bilbel ahih manin a “phuak ding ki-ut ciat hi” ci-in gen ngei hi. A la phuahte midangte sangin a hoih zawkna pen a aw ding (tune) zong masa-in tua khit ciangin a thumal, a kammal ding zong pan hi. Zingsang tungin a thawhphet ciangin lungsim sungah thu dang a lut ma-in la kammalte ngaihsun kik a, Zo la kam man/dik tak a hi hiam, mi zakdah theih ding, khasiat theihna ding kammal a zang kha hiam cih ngaihsun zel a, puahtoto ahih manin a la malte hoih diak se hi. Tua bek hi loin Topa in thupha a piak ngiat ahihna zong a thupi khat ahi hi. Ama hun lai-in Kalemyo khawngah Studio om nai loin, Zangkung mah delh kul a, sum a neih loh ciangin sum thalawh tawmin Zangkung pai hi. Zangkungah zong tuhun bang loin eimi tam nai lo ahih manin haksatna tampi kalah hih ciang a tung thei ahi hi. Khang thakte gamtat hoih lohna pana kep cingna dingin music leh la lim taka puah toh ding thupi sa mahmah a, Zola kammal zangin i late puah ding zong a deih ngitnget khat ahi hi. A hih theih lai teng Topa ading a kizat leh Pasian min thanna dingin a kizang den nuam mi ahi hi. Khangno pilna sinte zong pil dinga sin a hih manun hong “Hai kei un la,” i gam i lei adingin hong pilin hong sem un” ci thei hi.

1981 kumin Tedimah “Lengtong Band” ci-in phuan uh a, tua Band sungah Lengtong Pauno, Kam Khen Thang (makai) Go Hau, Sua Mang, leh Pau Thawnte kihel hi. Hih pen Zomi sungah Band masa pen hi dingin kiciamteh hi. A lasak kum 25 cin’na leh Kam Khen kum 50 cin’na Pawi Yangonah 2006 kumin thupitakin bawl uh hi.

(Hih pen Zomi Siamsin Magazine, 2006 sunga Deihpi tawh holimna sung pan kikaikhawmin a kibehlap ahi hi)